നിശബ്ദതാഴ്‌വരകളേ നിങ്ങളെനിക്ക്‌,
നക്ഷത്ര ശാന്തിയുടെ ശീലയില്ലാക്കുട തരുമോ?
നിശബ്ദതാഴ്‌വരകളേ നിങ്ങളെനിക്ക്‌
സ്വപ്നകൂടാരത്തിൻ മൂടുപടം തരുമോ?
നിശബ്ദതാഴ്‌വരകളേ നിങ്ങളെന്റെ
കളഞ്ഞുപോയ ശൂന്യമനസ്സിനെ തിരികെ തരുമോ?
ഇനിയും ചോദ്യങ്ങളായിരം ബാക്കിയുണ്ട്‌
കഥാഗതിക്ക്‌ നിരക്കാത്തവ...
നിങ്ങൾ നിരാശരെങ്കിൽ,
ഉത്തരങ്ങൾ നിശബ്ദമല്ലെങ്കിൽ അവ ഞാൻ പങ്കുവയ്ക്കാം...
അപ്പോൾ നാം തുല്യർ
തുല്യർക്കിടയിൽ കൂടുതൽ തുല്യർ.
കുറച്ചിടനേരത്തേക്ക്‌ എല്ലാമൊന്നോർക്കാം,
ഭ്രാന്തമായി നമുക്കാർത്തു ചിരിക്കാം.
അൽപനേരം പരസ്പരം മറക്കാം
നിസ്സ്വനത്തിലലിഞ്ഞ സുഗന്ധിയായലയാം.
കർണ്ണപഥത്തിൽ പതിച്ച സ്വരകണിക പോൽ
നിരാശയിൽ കുളിച്ച മുഖത്തെ പറിച്ചെറിയാം.
വരുന്നോ എന്റെ ബഹുവർണ്ണ ലോകത്തേക്ക്‌,
വന്നാൽ ഞാൻ നിങ്ങൾക്ക്‌ എന്റെ കഥ തരാം
ഒരു ബ്ലാക്ക്‌ ആൻഡ്‌ വൈറ്റ്‌ തിരക്കഥ.
....................... സ്വന്തം നിരാന്‍.
